Ni hano uri
Home > Amakuru > Igitera urushwima nyakuri n’iki. Ese n’uburozi koko?

Igitera urushwima nyakuri n’iki. Ese n’uburozi koko?

Urushwima ni indwara irangwa no kubyimba inda bidasanzwe kubera indwara nk’umutima, cyangwa umwijima bigatera umurwayi kugira amazi menshi mu nda ikabyimba.

Iyi ndwara y’urushwima ikunze kutavugwaho rumwe mu banyarwanda aho hari abavuga ko umuntu arwara urushwima barumuroze, cyangwa akaba yarakoze ishyano akarenga kuri kirazira.

Ibi ni ibisobanurwa n’umuyobozi w’ishami rishinzwe kurwanya indwara z’umwijima n’izindi ndwara zandurira mu mibonano mpuzabitsina mu Kigo cy’Igihugu cy’Ubuzima, RBC.

Dr Mbituyumuremyi Aimable yabwiye Izuba Rirashe ikinyamakuru dukesha iyi nkuru ko indwara zitera urushwima zihari kandi zizwi ku buryo ntaho zihuriye no kuba umuntu yarenze kuri kirazira cyangwa yarozwe.

Ati “Ubundi icyo mu Kinyarwanda twita urushwima mu ndimi z’amahanga ni ascite. Bivuga ko umuntu aba yagize amazi menshi akuzura mu nda ikabyimba kubera uburwayi runaka.”

Inkovu ku mwijima (Cirrhosis)

Muganga Mbituyumuremyi akomeza agira ati “ikintu cya mbere gituma umuntu arwara urushwima ni uburyo umwijima wangirika kubera uburwayi buwutera kubyimba (cirrhosis). Akenshi bikunze guterwa na za virusi nka hepatite B na C cyangwa kunywa inzoga.

Iyo umuntu amaze igihe kirekire anywa inzoga nyinshi, cyangwa arwaye izo virusi za hepatite mu mwijima, hari ukuntu umwijima ugenda ubyimba, ukongera ugakira. Ahari habyimbye hagasigara inkovu, nk’uko nawe iyo ukomeretse ku ruhu igisebe gikira hagasigara inkovu. Uko biba inshuro nyinshi, n’izo nkovu ziba nyinshi mu mwijima. Ni byo bita Cirrhose.

Iyo Cirrhosis na yo ituma amaraso atongera gutembera mu mwijima nk’uko bikwiriye, bigatuma umwijima ugenda urekura amazi avanzemo n’amaporoteyine. Izo poroteyine na zo zikomeza zikurura amazi mu nda, nyuma y’igihe amazi akaba menshi inda ikabyimba. Ubwo ni bwo tuvuga ko umuntu yarwaye urushwima cyangwa Ascite.

Uburwayi bw’umutima

Ikindi gituma umuntu ashobora kurwara urushwima ni ukuba yaba asanzwe arwaye umutima, iyo utabasha kohereza amaraso mu bice bitandukanye by’umubiri nk’uko bikwiriye (insuffisance cardiaque.)

Kubera ko umijima na wo ugira uruhare runini mu gitunganya amaraso ukayohereza mu mutima na wo ukayakwirakwiza mu bice by’umubiri, iyo utakibishoboye amaraso yirundira mu mwijima ntazamuke ngo agere mu mutima.

Uko akomeza kwirundiramo bituma umwijima na wo utangira kubyimba igihe kikazagera mu nda hagatangira kuzamo amazi inda ikabyimba.

Indwara z’imirire mibi ku bana

Ku bana bato barwara indwara ziterwa n’imirire mibi inda ikabyimba, akabyimba n’ ibirenge, no mu maso kubera kubura intungamubiri. Iyo indwara umwana ayitidanye cyane cyangwa ikamuzahaza ni bwo inda izamo amazi na bwo bikamutera urushwima.

Rero indwara zitera urushwima zirazwi ku buryo abantu badakwiriye guhita batekereza ko umuntu warurwaye aba yarozwe.

Yego hari igihe ashobora kurya uburozi bukamutera kuzana amazi mu nda ikabyimba, ariko si uko byaba ari byo birutera buri gihe. Kuko urumva ko rufata abantu mu bo ngeri zose ndetse n’abana kubera impamvu zitandukanye. ”

Urushwima nk’uko Dr Mbituyumuremyi abyemeza rushobora kuvurwa rugakira cyane cyane mu gihe icyaruteye na cyo gishobora gukira.

“Nko mu gihe rwatewe n’imirire mibi ku bana, bifata igihe cyo kumuha indyo iboneye buhoro buhoro, agahabwa n’imiti kugeza igihe azakirira.

Ariko iyo ari ukwangirika k’umwijima cyangwa uburwayi bw’umutima, mu gihe umwijima utavuwe cyangwa uwo mutima utarakira ntabwo urushwima rwakira. Gusa bahabwa imiti agabanya ayo mazi mu nda akazajya agenda agabanuka”

Dr Mbituyumuremyi kandi avuga ko nubwo hari indwara nyinshi zishobora gufata inyama zo mu nda zigatera inda kubyimba zidakwiriye kwitiranywa n’urushwima. Mu gihe umuntu agiye kwa muganga ni bwo bashobora kumenya icyo arwaye mu by’ukuri.

Richard
Mucyo dufatanye kuzamurana mu myumvire n'ubumenyi mubuzima, twandikire kuri e-mail: mubuzima1@gmail.com

izindi nkuru bisa

Igitekerezo cyanyu ni ingenzi.

This site uses Akismet to reduce spam. Learn how your comment data is processed.

hejuru